倫敦伊利沙伯綫列車告別之旅

市區綫新列車已投入服務一個星期,喺上週呢個時間,港鐵受倫敦運輸局管理合約委託營運嘅伊利沙伯綫(Elizabeth Line),就有一場列車慈善告別活動 👋 🚈

伊莉莎白綫月台

伊莉莎白綫全長 118 公里,得名自已故嘅女皇伊莉莎白二世陛下,分別由

大東方幹線(Great Eastern Main Line)各站停車服務

+

中央營運路段(Central Operation Section)

+

大西方幹線(Great Western Main Line)慢綫班車 組成,由東至西貫通英國倫敦中心部分並連接附近城市,被喻為戰後最重要基建投資之一

Credits : 倫敦運輸局

女皇陛下喺今年 5 月登基白金禧紀念時,到臨揭幕中央營運路段,標誌住三段鐵路共 41 個車站將近完成翻修和投入服務,我地曾以散步方式同大家介紹:

同香港嘅鐵路項目相似嘅係,伊莉莎白綫會帶嚟全新列車和訊號系統,新車會分別喺新建路段,以及逾 180 年歷史嘅兩條鐵路幹線服務乘客

Class 315 型火車

因此最初由舊英國國鐵於 1980 年引入,再傳承至自四任鐵路營運商嘅 Class 315 型火車便要退出歷史舞台,鐵路迷團體 Branch Line Society 便與港鐵舉辦兩次慈善告別之旅,參加嘅乘客需經無現金交易方式購票,收益全數撥歸外展照顧離家兒童組織 Railway Children

Class 315 車廂

Class 315 型與同時期生產,東鐵綫嘅電氣化火車機件設計相似,最高車速同為每小時 120 公里,系列中嘅成員亦係每三卡車為一組,駕駛室有可架設逃生木梯嘅緊急出口,針對站距短而需要頻繁加減速嘅車程而製造 🔧⚙️

當日列車來回倫敦中心部嘅 Liverpool Street 車站及雅息士郡嘅 Shenfield 站,並特別駛經幾條貨物列車常用嘅讓車線,車站管理公司以及英國運輸警察亦協助管理人流,俾乘客有時間參觀埋列車駕駛室後合照。稍後,車廂都會運到威爾斯南部作動態保存

而喺香港,由電氣化火車演變成嘅中期翻新列車,隨東鐵綫過海段落成喺感謝之旅後而退役,因應列車目前嘅技術設置,港鐵公司會自行保留 6 卡車廂是為鐵路文物,其他車廂及組件會分別捐贈予學校、政府及非牟利團體作保育用途 🌲

--

--

MTR Service Update

影子的鐵路公司溝通渠道,目的為示範公共事業之應有水準 A shadow digital media communication platform of the railway operator to demonstrating an expected performance of public bodies