港鐵接受感應式付款卡

各行車綫除機場快綫外，由 12 月 23 日（星期六）起讓乘客用不論係實體或放咗入手機嘅感應式付款卡出入閘，首三季會先接受 Visa 卡，到 2024 年下半年就會同時接受 Mastercard 及 #銀聯 卡

而全綫客務中心嘅系統亦已升級，支援處理電子付款票務問題，同埋俾乘客用各種電子付款方式購買全月通、都會票及各款紀念品 🖥

增加付款方式係世界各大城市公共交通網絡，係近年嘅發展趨勢，國際金融中心倫敦嘅巴士最先喺 2012 年起接受感應式（Contactless）付款卡，到 2014 年起唔再處理現金交易，同年所有地鐵、市內嘅近郊火車、輕鐵、電車及纜車服務亦可用感應式付款卡乘搭 🚌 🚇 🚈 🚉 🚠

同時，紐約、新加坡、巴黎、曼谷同多倫多嘅地鐵都先後接受 Contactless 付款卡，此外喺東京、斯德哥爾摩同洛杉磯嘅鐵路則增加咗 QR Code 車票選項

好處係遊客毋須先「唱定錢」、購買當地專用交通卡，憑自用開嘅付款卡便可直接上車；而本地乘客一吓唔記得帶交通卡或者增值，亦可即刻用手機出入閘，避免費時失事或喺繁忙時間阻到其他等入閘嘅乘客

由 2022 年底開始，港鐵都會升級整各行綫嘅自動收費系統，同時支援 八達通 Octopus 、車票二維碼、感應式付款卡嘅新閘機及升級閘機陸續投入服務，將全數取代轉棍閘機，方便唔同需要嘅乘客出入閘

全新嘅票務機投入服務後，亦讓南港島綫以外嘅乘客一樣能毋須等候職員協助，便可自行處理票務問題，將來港鐵亦會有數碼車票，用開各種常客票嘅乘客，可以一路行一路喺手機準備好車飛入閘，與現時機場快綫各款喺 MTR Mobile 內嘅單程 / 多程車票類似 📲

用非接觸式付款卡入閘時，記得到藍色閘機，閘機附近嘅地板都會有大型告示。出入閘時應使用同一媒介嘅付款卡，例如係只用同一張實體卡，或者係同一張喺 Apple Pay / Google Pay 嘅付款卡出入閘 🟦 🚶🏻🚶🏽‍♀️

入閘時，閘機會與其他交通工具一樣，先向發卡金融機構取得授權，進入頭等車廂前，乘客須到核准機拍同一張付款卡（車廂分隔門的核准機將於稍後換成新型號），系統會於出閘後的下一個工作天早上扣款

留意經尖東 / 尖沙咀轉車車程暫時會視作獨立兩程車，若於行程途中發現遺失付款卡，請盡快自行或到月台召援專綫搵車站職員幫手，打俾發卡銀行報失 📞 🗣️

日常乘客可於港鐵或銀行網站查閱交易紀錄，而機場快綫櫃位及 MTR Mobile 會繼續俾乘客用電子付款方式買飛，新閘機會喺 2026 年擴展至機場快綫及市區預辦登機層