車廂載客情況顯示

隨屯馬綫喺 2021 年 6 月底全綫貫通，沿途各站 54 個月台嘅資訊螢幕，都加咗「車廂載客情況顯示」 🖥

近年喺荷蘭、日本、台灣、新加坡都有類似嘅科技，鼓勵月台嘅候車乘客，唔好不斷喺幾個較受歡迎嘅車門前排隊；而可以喺列車埋站前，先去較少人嘅位置，盡快上到車抵達目的地 👥 ↔️

而早於 1999 年，香港嘅列車會因應車廂避震氣袋受壓後，氣袋伸縮嘅情況，由感應器估算出大約載客量情況，再顯示喺駕駛室嘅電腦螢幕，供車長參考

但例如喺機場快綫嘅運作運境，大部分乘客都會帶埋行李搭車，行李重量亦各有不同，透過載重數字嚟判斷車廂餘下多少企位、坐位，明顯唔可行 🧳 🔢

於是喺 2015 年，一列港島綫列車上面就開始試行，於車門通道頂部，安裝 80 個由德國公司 INIT Group 製造嘅熱能掃描器，結果顯示「數人頭」嘅準確度高達 99%，但由於掃描器造型睇落好似攝影鏡頭，考慮到之後嘅社會情況，試驗需要告一段落，但就為日後揀選唔同技術，提供咗寶貴嘅經驗

目前屯馬綫嘅「車廂載客情況顯示」，則回歸到量度載重數字嘅方式，每當列車喺上一站開車後一段時間，發射器會將數字傳送到下一個月台嘅資訊螢幕

而容許乘客携帶多件行李上落車，係機場快綫服務嘅一部分，所以佢地嘅車廂內則會安裝新嘅分析儀器，掃描車廂空間嘅佔用情況，從而得出邊卡車會有較多空位

香港已經步入 #智慧出行 嘅年代，唔同嘅科技會喺乘客開始行程前、行程途中、準備離開車站時，利用「大數據」提供各種資料，由細緻位開始令每程車逐漸變得「暢順．自助．不求人」💨📱