大型道碴吸送機

東鐵綫過海將近一年，最近更陸續恢復其跨境交通的功能，而東鐵綫大部分路段嘅軌道道床，因其歷史和建築特色，均由道碴舖成

道碴（ballast）亦即係路軌底下嘅「碎石仔」，係最傳統嘅軌道道床，能將逾 500 噸重列車行駛時帶嚟的重量平均分散，避免隨之而嚟產生嘅震動影響同鐵路接鄰嘅地方，同時便於排走因天雨而來的積水 🛤

但道碴亦會受年月風化，進一步變成更細嘅碎片而影響其效用，因此東鐵綫曾於 1993 至 1995 年重舖全綫道渣，當年嘅工程舖下共厚 300 mm 嘅道渣，同時讓火車喺 大學 至 大埔墟 站之間，改用今日近教育大學球場嘅新路段，縮短行車時間

另一方面，近年為改善月台過往高低不平的狀況，以便安裝月台門，喺部分月台嘅範圍，都舖咗新道碴令車廂與月台邊緣高度更為吻合

然而，東鐵綫改用新車廂後，因列車性能提升咗，維持高速行駛嘅時間比以往長，基建設施更需要維持喺良好狀態，所以東鐵綫喺 2020 年中開始全面換上新道碴

工程人員首先將羅湖編組站部分範圍變為臨時工場，讓新道碴裝上工程列車，同時停放全新「大型道碴吸送機（Ballast Suction Machine）」，吸取機喺唔同國家都相當普遍，佢會於非行車時間運作，能快速吸走舊道碴同時舖上道碴，將換道碴嘅工作加快 30% 💨

同時，羅湖站因疫情而關閉咗三年，工程人員期間曾安排喺個別日子提早結束其村民列車服務，以集中施工。另一邊廂，港鐵公司亦與中方嘅廣深鐵路協調，更換東鐵綫位於港、中邊境上嘅軌枕，並翻髹羅湖橋橋身

喺舖設新道碴嘅夜晚，工程範圍無可避免會有一定嘅聲浪，希望沿綫嘅住戶理解，呢個係維持公共基建能有效運作嘅必要工序 🔧 🚧

而換上新道碴後，列車亦會以稍慢嘅車速駛經該路段，不過東鐵綫嘅行車時間設定已經考慮咗是項工程嘅需要，所以對日常車程嘅影響唔會超過一分鐘 ⏳